Alarobia 23 Jona 2027
(Hoy Jesosy :) Ny lanitra sy ny tany ho levona, fa ny teniko tsy mba ho levona. Matio 24:35
Sambatra ny olona izay … ny lalànan’i Jehovah no sitrany ; eny, ny lalànany no saintsaininy andro aman’alina. Salamo 1:1-2
Ny hoe misaintsaina lalina dia midika hoe mieritreritra lalina, „mandinika” ny Tenin’Andriamanitra, toy ny ataon’ny omby mandinika ny haniny. Ny fisaintsainana lalina ara-Baiboly dia mitaky ny hamakiana ny Baiboly sy hahatakarana ny heviny (Asan’ny Apostoly 8:30). Ity misy fomba tsotra, afaka arahinao mba hisaintsainana lalina :
Angataho ny Tompo Jesosy hampahazava anao, sy hanome anao ny fahendrena ilaina mba hahatakaranao ny Teniny. Vakio —amin’ny feo mafy, raha afaka atao- ny teny nosafidinao. Aza misalasala, mamerimberina miadana izany, imbetsaka. Tsipiho izay andinin-tSoratra Masina (iray na maro) misy akony manokana ao aminao, ary tadidio mba handinihanao azy (ireo) mandritra ny tontolo andro ; mety ho teny nolazain’Andriamanitra i(re)o, na zava-nitranga, na olona nanohina anao. Mametraha fanontaniana amin’ny tenanao : inona no tian’ny Tompo holazaina ahy manokana ? inona ny zavatra nianarako momba Azy ? momba ny sitrapony ? tao amin’io teny io ; ahoana no hampiharana ny Teniny ?
Ny fisaintsainana lalina ara-Baiboly, atao tsy tapaka, dia hahafahantsika miaina, amin’ny andavanandrontsika, ny fanatrehan’Andriamanitra sy ny fiombonana amin’ny Tompo Jesosy. Taomin’izany fisaintsainana izany isika hitadidy ireo teniny, mba hitoetra ao anatintsika ireo (Jaona 15:7). Dia Izy mihitsy no hitoetra sy hiasa ao anatintsika (15:4). Ny fisaintsainana lalina dia mampifahatra antsika ao amin’ny Tenin’Andriamanitra, Teny izay tsy mba ho levona (andinin-tSoratra Masina androany). Amin’izany isika dia ho voatafy fiadiana hiatrehantsika ireo [lazain’ny tsy mino, hoe] kisendrasendra, sy ireo fitsapana eo amin’ny fiainana. Farany, araka ny filazan’ny mpanao ny Salamo 1, dia mahasambatra antsika izany ! Koa nahoana àry no tsy hatao ?
araka an’i Alienor S. (tapitra)